मोफसल खबर
साउन २४
कपिलवस्तुको शिवराज नगरपालिकामा कोभिड १९ कोरोना भाइरस संक्रमित विरामीहरुको उपचारका लागि बनाइएको आइशोलेशन अस्पताल निर्माण कार्य सम्पन्न भएको छ । अस्पताल निर्माण उपभोक्ता समितिले निर्माणको सम्पूर्ण काम सकिएको जनाएको छ ।
२०७७ जेठ ३ गते प्रदेश ५ सरकारका तर्फबाट कोरोना नियन्त्रण लागि आन्तरिक मामिला तथा कानुन मन्त्रि कुल प्रसाद के.सी.को अध्यक्षतामा जिल्ला प्रशासन कार्यालयमा बसेको बैठकले जिल्लाका विभिन्न स्थानिय तहमा कोरोना उपचारका लागी आइशोलेशन अस्पताल निर्माण र संचालन गर्ने गरेको निर्णयलाई कार्यान्वयन गर्दै शिवराज नगरपालिकाले जेठ ४ गते व्यापार संघका अध्यक्ष महादेव पोखरेलको अध्यक्षतामा निर्माण समिति गठन गरी निर्माणको काम सुरुवात गरेको हो ।
नगरपालिकाको ६५ लाख लागत तथा १० प्रतिशत स्थानियहरुको श्रमदान गरी कुल ७२ लाख ३ हजारमा ३० शैयाको आइशोलेशन अस्पताल तयार भएको निर्माण समितिका अध्यक्ष पोखरेलले बताए ।
५ वटा बेड अटाउने ६ वटा हल, १ वटा स्टोर रुम,१ स्टाफ रुम, १ विरामी चेकजाँच कक्ष, स्टाफका लागी १ वटा एटेच रुम, महिला पुरुषका लागि ६÷६ वटा शौचालय ,बाहिर हात धुने व्यवस्था सहितको अस्पताल तयार भएको पोखरेलले बताए ।
निर्माण समतिले अस्पताल निर्माण सम्पन्न गरे पनि संचालनमा आउन भने केहि दिन लाग्ने नगर प्रमुख नेत्रराज अधिकारीले बताए । अस्पताल जाने बाटो बर्षाका कारण विग्रिएकोले बाटो निर्माण पछि, आइशोलेशन संचालन ल्याईने उनले बताए ।
अस्पताल निर्माण सम्पन्न भएको भए पनि अझै फरफार नभएको प्रमुख प्रशासकिय अधिकृत शेषकान्त पौडेलले बताए । अस्पताल भवन निर्माण भैसकेको र अस्पतालका लागी आवश्य अन्य उपकरण सामाग्री खरिद गरी ल्याउन केहि समय लाग्ने हुदाँ करिब १ साता पछि अस्पताल संचालनमा आउने पौडेलले बताए ।
पछिल्लो समय नगरपालिकामा समुदाय स्तरमा नै कोरोना संक्रमित समेत भेटिएकाले छिटो आइशोलेशन अस्पालत संचालनमा आउनु पर्ने स्थानियले बताएका छन । हाल नगरमा ३७ जना सुपादेउराली आइशोलेशनमा उपचाररत छन भने १७ जना राष्ट्रिय मा.वि.को क्वारेन्टाइनमा रहेको स्वास्थ्य शाखा प्रमुख चुडामणि भट्टराईले बताए । आइतबार पुन पिसिआर स्वाब संकलन गरिने भट्टराईले बताए ।
प्रतिक्रिया