कपिलवस्तु –
कपिलवस्तुको सीमावर्ती क्षेत्र मर्यादपुर बजारमा १३ हजार नेपाली नक्कली नोटसहित दुई भारतीय पक्राउ परेका छन्।
जिल्लाको यशोधरा गाउँपालिका ७ मर्यादपुरस्थित एक मदिरा पसलबाट १३ वटा हजारका नक्कली नेपाली नोट सहित उनीहरु पक्राउ परेका हुन्।
भारत जिल्ला सिद्धार्थनगर थाना सोहरतगढ ग्राम अतरी बस्ने वर्ष ३२ का फैसल अहमद र ४२ बर्षीयको विनोद यादव सो नक्कली नोटसहित पक्राउ परेको हुन्।
प्रहरी नायब उपरीक्षक मीन बहादुर घलेका अनुसार पक्राउ परेका दुवै जना स्थानीय चन्द्रभान गुप्ताले संचालन गरेको करन वाईन सेन्टरमा सामान किन्न आएका थिए।
नक्कली नोट गुणस्तरीय रङ्गिन प्रिन्टरबाट प्रिन्ट गरिए जस्तो देखिएको छ। तर प्रिन्ट गरिएको वा छापिएको त्यसको यकिन भने भएको छैन। नियन्त्रणमा लिइएका दुई जना माथि मुद्रा सम्बन्धि कसुर सम्बन्धी मुद्दा चलाई थप अनुसन्धान कार्य भई रहेको प्रहरी नायब उपरीक्षक घलेले बताए।
पछिल्ला केही समयमा जिल्लामा नक्कली नोट सर्वाधिक देखिएको छ । यस अघि पनि एभरेष्ट बैक तौलिहवा शाखामा समेत एक नक्कली हजारको नोट फेला परेको थियो। यस्तै केही महिना पहिले समेत चार नम्बर जीतपुर स्थित बिद्युतको महसुल काउन्टरमा समेत हजारको नक्कली नोट फेला परेको थियो। यससँग बजारमा नक्कली नोटको मात्रा अत्यधिक भएको अनुमान गर्न सकिन्छ।
बजारमा अहिले नक्कली नोटहरु हुन सक्ने भएकाले आवश्यक सावधानी अपनाउन प्रहरीले अपिल गरेको छ । शंकास्पद नोटहरु फेला परेमा नजिकको प्रहरी कार्यालयमा जानकारी दिन प्रहरीले अनुरोध समेत गरेको छ ।
प्रतिक्रिया