कपिलवस्तु -नेपाल कम्युनिस्ट पार्टी (एमाले)ले आसन्न निर्वाचनलाई लक्षित गर्दै कपिलवस्तुको शिवराज नगरपालिका वडा नम्बर ३ मा घरदैलो अभियानलाई तीव्रता दिएको छ। क्षेत्र नम्बर ३ का प्रतिनिधिसभा सदस्य उम्मेदवार बिरेन्द्र कुमार कनौडियासहित नेता–कार्यकर्ता टोलटोलमा पुगेर मतदातासँग प्रत्यक्ष भेटघाट गरेका हुन्।
घरदैलोका क्रममा उम्मेदवार कनौडियाले आगामी पाँच वर्षभित्र अधुरा योजनाहरूलाई प्राथमिकतामा राख्दै सडक स्तरोन्नति, नाली निर्माण र खानेपानी व्यवस्थापनलाई तीव्र गतिमा अघि बढाइने प्रतिबद्धता जनाउनुभयो।
बलुबाबा हचुवामा पुगेका कनौडियालाई स्थानीय बासिन्दाले अधुरा सडक छिटो सम्पन्न गर्न तथा नाली निर्माणका लागि प्रदेश र केन्द्र सरकारसँग प्रभावकारी पहल गरिदिन आग्रह गरेका छन्। त्यसैगरी भितरिया, मदवा, देउराली टोल र खरेन्द्रपुर लगायतका क्षेत्रमा पनि घरदैलो कार्यक्रम सम्पन्न गरिएको थियो।
स्थानीयका समस्या सुन्दै कनौडियाले ग्रामीण भेगको समग्र विकासबिना देश समुन्नत हुन नसक्ने उल्लेख गर्दै विकासको निरन्तरता, पारदर्शिता र दिगोपनाका लागि आफू प्रतिबद्ध रहेको दोहोर्याउनुभयो।
घरदैलो अभियानमा स्थानीय स्तरमा नेता–कार्यकर्ताको बाक्लो सहभागिता रहेको थियो भने मतदाताबाट सकारात्मक प्रतिक्रिया प्राप्त भएको एमालेले जनाएको छ।
प्रतिक्रिया