कपिलवस्तुका तीन वटै क्षेत्रमा निर्वाचन अधिकृत कार्यालय स्थापना 

आगामी फागुन २१ गते हुने प्रतिनिधिसभा सदस्य निर्वाचनलाई लक्षित गर्दै कपिलवस्तुका तीनवटै निर्वाचन क्षेत्रमा निर्वाचन अधिकृतको कार्यालय स्थापना गरिएको छ। निर्वाचन आयोगको निर्णयअनुसार क्षेत्र नं. १ को कार्यालय वाणगङ्गा नगरपालिका कार्यालय परिसरमा, क्षेत्र नं. २ को कार्यालय जिल्ला समन्वय समिति कार्यालय तौलिहवामा तथा क्षेत्र नं. ३ को निर्वाचन कार्यालय शिवराज नगरपालिका–५, चन्द्रौटास्थित दुर्गा मन्दिर परिसरमा स्थापना गरिएको हो। मुख्य निर्वाचन अधिकृत रमेश शर्मा पौडेलले तीनवटै निर्वाचन अधिकृतको कार्यालय स्थापना भएसँगै निर्वाचनसम्बन्धी सम्पूर्ण कार्य औपचारिक रूपमा सुरु भएको जानकारी दिनुभयो। उहाँका अनुसार निष्पक्ष, स्वतन्त्र र व्यवस्थित निर्वाचन सम्पन्न गराउन आवश्यक तयारी तीव्र रूपमा अघि बढाइएको छ।

प्रमुख जिल्ला अधिकारी जनार्दन गौतमले निर्वाचनलाई सफल, शान्तिपूर्ण र व्यवस्थित रूपमा सम्पन्न गर्न प्रशासन पूर्ण रूपमा सक्रिय रहेको बताउनुभयो। सुरक्षा, व्यवस्थापन तथा समन्वयका सबै पक्षमा ध्यान दिइएको उहाँको भनाइ छ। जिल्लाभर कुल २३५ मतदान स्थल र ४९० मतदान केन्द्र रहेका छन्। निर्वाचन क्षेत्र नं. १ का निर्वाचन अधिकृत गणेश कुमार गौतम, क्षेत्र नं. २ का निर्वाचन अधिकृत रमेश शर्मा पौडेल तथा क्षेत्र नं. ३ का निर्वाचन अधिकृत कुबेर पाण्डे रहनुभएको छ। कपिलवस्तु क्षेत्र नं. ३ का निर्वाचन अधिकृत कुबेर पाण्डेले कार्यालय स्थापना भएसँगै निर्वाचनसम्बन्धी सम्पूर्ण प्रशासनिक, प्राविधिक तथा व्यवस्थापकीय कार्यहरू यही कार्यालयमार्फत सञ्चालन गरिने जानकारी दिनुभयो। साथै, निर्वाचन प्रक्रियामा सरोकारवाला सबै पक्षको सहकार्य अपेक्षित रहेको उहाँले उल्लेख गर्नुभयो ।